Australiëdag

Hierdie is sommer 'n mid-week blog, want die naweek behoort heeltemal te besig te wees.
Dis môre Australiëdag in Australië! (26 Januarie 2012) wanneer Aussies alles vier wat Australiaans is.

Ek moet dit vir die Aussies gee: hulle is baie groot op eg Australiaans! Hulle weet deur Australiaanse besighede te ondersteun, word werk in Australië geskep en die wins word binne Australië spandeer en so groei die ekonomie.

Ons wag al lankal vir ons vlug na Suid Afrika, maar moet nog 'n dag wag. Ons gaan, soos in die video verduidelik word, 'n "Barbie" op die strand hê. Link

Hier is 2012 se Australiëdag "Lambassador-video". (soos die Braai Day video in Suid Afrika)

Ons is amper oppad! Ons kan maar net hoop dat al die biltong, braaivleis, koeksisters, beskuit, kuiers met vriende en familie ons sal verveel voor ons moet terug keer!

Kan nie wag om julle te sien nie,

Liefde en Groete,

Johann

Net nie nog sjokolade nie asseblief...

Ek kan nooit help om kinders jammer te kry wanneer ek sien dat winkels op Oukersdag reeds "Back to school" advertensies begin uit stuur nie. Dink maar net hoe depressief mens sou raak as daar 'n "back to work sale" net na Kersfees was?

Paaseiers op die winkelrakke in Januarie.

Dit gesê is daar al sedert Oukersdag reeds in sommige winkels Australiëdag en Valenteinsdag produkte op die rakke gesit en al het die skole nog nie eers begin nie, ek het vanmiddag in ons plaaslike Sydney-Woolworths gesien dat daar reeds paaseiers op die rak is!?
Hierdie was maar 'n lang week. Net soos wanneer 'n hond oor sy eienaar treur wanneer dìe weggaan, kry ek myself vreeslik jammer as Jeanelle so lank van die huis af moet weggaan en hierdie week was dit besonders lank, Dinsdag tot Vrydag. Anders as 'n hond, hou ek nie op met eet nie, ek begin vreet. Ek was iewers hierdie week gou in die winkels om voorraad te koop toe ek hot-cross buns op 'n uitverkoping kry. Ek koop toe 'n pakkie om saam met koffie te eet, maar dit was eers by die tweede 'bun' dat ek besef daar is iets verkeerd. Die 'buns' smaak net nie so lekker soos ek onthou nie!? Dis toe dat ek agter kom dis die rosyntjies wat kort en hot-cross buns sonder rosyntjies = kaneel-buns. En toe kry ek myself éérs jammer.
By die werk was dit moeilik om gemotiveerd te bly, omdat ek nog net 3 werksdae het in hierdie maand, moet iemand nou koop, of wag tot ek terug is.
Ons het hierdie naweek 'n plekkie gesoek om koek en koffie te eet, maar dit was 'n stryd. Omdat ons uit bak-families uit kom, is ons lankal gewoond aan teleurstelling as dit kom by enige koek wat nie deur ons ma's gebak is nie. Na 'n lang soektog het ons by 'n sjokolade restaurant uitgekom wat lekker gelyk het. In 'n oomblik van swakheid, bestel ons mos toe meer as wat ons kon eet. Ek moes seker moeilikheid gesien kom het toe die kelnerin met die eerste bord (Brownie met gesmelte sjokolade) vra wie s'n dit is...
Toe sy die derde bord bring (wafel met gesmelte sjokolade), het ons altwee afgekyk, terwyl sy dit saggies op die tafel se verste punt neergesit het en toe alles reeds by ons tafel was, het sy hoflik gevra: "Would that be all for today?" ...Ons antwoord toe soos een man "Yes, please, thank you!"  Sy vat die tafelnommer en ons het haar nooit weer gesien nie. As ons nooit nie gou weer sjokolade sien nie, sal dit oraait wees.

Ons het al begin pak en sien julle binnekort! (Australië dag kom later hierdie week, kyk uit vir die video-link)

Liefde en Groete

Johann

'n Week 'in transit', met verkope sukses

Die jaar het begin met baie besighede wat eers op Maandag 16 Januarie oop maak. Ek weet ook nie hoe hulle 'n bestaan maak met so 'n laat begin nie. Ons kan seker nie te veel vinger wys nie, want sodra alles net lekker aan die gang is, glip ons uit na 'n vinnige Suid Afrika besoekkie. 

Dis baie lekker hier, maar ons het nou 'n bietjie van 'n lang 'stretch' gehad. Ons was 8 maande laas by die huis. Klink dalk nie so lank nie, maar dit voel vir ons nou al baie lank. Ons moet nou net eers 'n bietjie by ons eie mense gaan 'herlaai'. Dis nog net een vol week en 4 dae, waarvan een, gelukkig, vir ons 'n vakansiedag is!

Ek het na 'n lang en plat leerkurwe, my eerste masjien verkoop. Die onderhandelings het vir twee ure aan gehou op die eerste dag en nog twee op die volgende. Ek het die sjinees later so deurmekaar gepraat dat ek self nie meer geweet het wat ek belowe het nie. Die ys is nou gebreek en ek hoop dis die begin van nog baie suksesvolle onderhandelings. 

Jeanelle was Maandag oggend tot Woensdag middag in NewZealand en Vrydag gou in Brisbane. Ek kon darem 'n goeie ontbyt saam met haar geniet in die 'lounge', maar het daarvoor betaal toe die parkering $22 kos, lol.

Ons tweede huis in Sydney, die 'Qantas Lounge' .

Hierdie week is sy weer Dinsdag tot Vrydag in Adelaide. 

Die naweek was daar 'n vinnige draai in die winkels, maar niks besienswaardig nie. Het wel hierdie oulike foto geneem terwyl ons vir Simoné iets kleins gesoek het. 

... uit die kwaliteit van die foto, het die volgende plakkaat begin sin maak:

GetARealCamera.com

Ek het ook weer moed vir hierdie week se verkope en onderhandelings uit ons inkopies gekry; veral nadat 'n meisie my, sonder om te bloos, $4.20 vir 'n koffie gevra het, wat eintlik $2 kos wanneer jy jou inkopie-strokie wys. Ek het niks gesê nie, hoewel ek eintlik verwag het dat sy om verskoning sal vra wanneer ek betaal. Sy het seker gemaak dat almal wat hierdie week iets by my wil koop en oor die prys onderhandel, dit gaan ontvang! (en met 'dit' bedoel ek nie afslag nie.)

Kyk gerus volgende naweek uit vir my spesiale "Australiëdag" blog!

Liefde en Groete,

Johann

Back to the grind stone

Nuwejaarsdag het verby geblits. Ons het die grootste deel van Maandag 2 Januarie om getreur, omdat ons kort vakansietjie/breukie tot 'n einde gekom het en ons Dinsdag weer moes gaan werk. Die Bothmas het die koerante gehaal, sien uittreksel in Beeld - 2012-01-02. (As jy nie die hele berig wil lees nie, hulle word in die laaste lyn genoem.)

My kar, in die werk se parkering. (Heel links)

Dit lyk vir my of die jaar maar so 'n week of wat gaan vat om aan die gang te kom. Baie plekke is nog hierdie week toe. Ek was deel van die ghost-staff hierdie week. Dit was net ek en een ander verkoopsman wat die fort moes hou. Die goeie ding daarvan was dat ek ook van die 'leads' kon kry, wat my kanse op verkope verhoog het, maar dit was nogals woes aan die diep kant. Skielik moes ek self onderhandel. Ek kan net sê: dit het goed gegaan, maar ek het nog baie om te leer. Drie voornemende kliënte het ingebel: Sam, Adam en Mark. Met Mark het ek, te gou, 'n spesiale aanbod aanbeveel wat toe te duur is in vergelyking met die opposisie, agv al die 'free' giveaways en Sam wou alles verniet hê en kon toe steeds nie kwalifiseer vir finansiering nie. Mark het darem die forms geteken, maar ek is onseker of hy alles reg verstaan het, agv die Sjinese kommunikasie gaping, so hy moet nog ja sê as finansies hom Maandag skakel. (Hou maar duime vas, dis dalk my eerste 'sale'. Lol.) 

Vrydag aand het ons Mission Impossible gaan kyk. Dit was baie goed. Dit was soos een lang BMW, Mini en Apple advertensie. Gepraat van advertensies, hier is ook een van die advertensies wat tans by die fliek en op Australianse TV vertoon.

Ongelukkig was ons altwee hierdie week siek, ek het verkoue gehad en Jeanelle keelseer.

Vanoggend (Saterdag) het ons darem altwee beter gevoel (moontlik agv 'n goeie nagrus, maar ek kan nie te veel oor slaap kla nie, want ek glo die Bothmas kry op hierdie stadium baie minder slaap as ons in. :-) ). 

Dis 'n pragtige dag in Sydney en ons het hier in ons ou woonbuurt, langs die Harbour Bridge, kom piekniek hou met ons fietse. Dit was nogals 'n groot trek; met Kindle vir Jeanelle om te lees, iPad vir blog, kos, bier, water, komber, boek vir my en Monopoly vir ingeval ons verveeld raak. Hier was ook 'n troue langs die water, tradisioneel in Australië, dra die bruidegom 'n donkerbril. Díe word dan ook op meeste van die troufotos ook op gehou!? Ai!

Sterkte aan almal wat hierdie week weer begin werk. Jeanelle begin ook weer 'travel' en dis hierdie week NewZealand, onder andere. Ek hoor dis darem nog net 18 slapies voor ons kom kuier!

Baie Liefde en Groete,

Johann

Voorspoedige 2012

Die nadeel van presente onder die boom sit voordat Kersvader dit bring, het ek geleer toe Jeanelle sê: " ek hoev nie meer soet te wees nie, ek het klaar presente." 

Ons wou wag tot Kers-oggend om presente oop te maak, maar kon nie. :-) 

Die vakansietjie het met 'n heerlike sonnige dag begin, maar ons was besig om 'supplies' te koop en teen die tyd dat ons kon strand toe gaan, was dit koud en bewolk. Ons kyk toe maar (byna) al die DVD's in die 'DVD-Vending Machine' gedurende die reënerige dae.

Ons het so bietjie vakansie 'inception' gehad (vakansie in vakansie); ons is gou vir twee aande na die Hunter-Vallei, Sydney se naaste wynlande, 1.5ure uit die stad uit.

Nadat ons, ons sleutels opgelaai het by die hotel, was ons net betyds om een wynplaas oop te kry. Hoewel die vrou wat ons gehelp het, nie gelyk het of sy meer van die wyn geweet het as wat op die etiket staan nie, het sy vir ons al die kaarte en aanwysings gegee na alles wat ons nie kon mis nie, onderandere die Hunter-Vallei Tuine wat met 1000'de liggies opgemaak is.

Ons was ook by 'n sjokolade en fudge winkel, 'n kaas winkel met heerlike feta-kaas en 'n wynplaas wat spesialiseer in vonkelwyn en alles wat borrels maak/in het. Die laaste wynplaas was ook die ideale plek om 'n bottel vonkelwyn vir oujaarsdagaand te kry. So hardseer soos dit is, het ons gisteraand in Sydney gesit en die  asemrowende vuurwerke op die TV gekyk.

Aan die ander kant van die wêreld het die Bothmas hulle Nuwejaar in die hospitaal deur gebring, baie geluk met julle nuwe seun! Ons is seker hierdie gaan vir julle 'n jaar weer vol nuwe erfarings wees.

Ons het darem vandag so bietjie son gekry, na 'n dag op die strand. Waarna ons aangetrek het vir ons nuwejaars diens, 8pm volgens die kerk se webwerf. Daar aangekom was ons die enigste mense daar. Daar sit ons toe in die kar; 'All dressed up and nowhere to go.'

Ek wens vir julle almal 'n voorspoedige 2012!

Baie liefde en groete,

Johann