Angs, Stres en bietjie vars lug

Saterdag oggend was ek eintlik nog op pad huis toe na die Kers-afsluiting. Daardie tyd van die aand raak die strate bietjie rof, met polisie en ‘bouncers’ wat orde probeer handhaaf. Kom ons sê maar net: “Nothing good happens after 23:00.” Dit het my wel gehelp om te slaap, want wat ek nie geweet het nie is dat ek die res van die naweek seker 50 keer sou droom hoe ek vir die baas verduidelik waarom hy my nie kan afdank nie. Ek het tussen drome, terwyl ek sukkel om te slaap, selfs aan ons nuwe ‘budget’ gewerk, die een sonder my salaris.

Saterdag het Jeanelle ’n vriendin oor genooi om te kom ‘Macaroons’ maak. Dit was baie lekker, daar was gou niks oor om af te neem nie, anders kon ek julle wys.

Die week vantevore het ek die ‘Dopper-Kerk’ belowe dat ons Sondag kerk toe sou kom. Ons het byna vergeet dat Jeanelle ook twee name van ’n kersboom gehaal het by die ander kerk, so ons moes gou Saterdagaand na Kmart gaan. Tien minute voordat hulle toe maak, moes ons ’n geskenk kry vir ’n 3 jarige seun en ’n 5 jarige meisie.

Sondag het Jeanelle met ‘migraine’ wakker geword en eerder as om na elkeen na ’n kerk toe te gaan, het ek toe na albei kerke. Ek het soos Kersvader van kerk na kerk gery om geskenke af te laai. Eers die kinders se geskenke. Dit moes blykbaar al 9 Desember daar gewees het, maar ek het bietjie beter gevoel toe die een diaken sê: “It’s never too late for presents.”

Daarna is ek na die Dopperkerk waar ek vir die tweede keer die week alleen by ’n Kerssangdiens was, gelukkig kon ek hierdie keer die geskenke uitdeel met die regte name op. Ek moes ook vir almal vertel dat ons weg gaan vir Kersfees, omdat ons te sleg gevoel het om die dominee se uitnodiging, om Kersdag saam met hom en sy gesin, in hulle nuwe pastorie, deur te bring, van die hand te wys. Sy arme gesin trek eers 4 dae vroeër, in die nuwe pastorie in en nou nooi hy alreeds mense. Dis ook nie die eintlike rede nie. Dis ongemaklik om ‘’n gesprek met hom te voer. Dis hartseer genoeg om Kersfees vêr van ons familie te wees. Die gedagte van Kersdag saam met die ongemaklike dominee, sal my hartstogtelik laat begin huil.

Maandag, na nog ’n lang onrustige nag, was ek bang dat dit die dag sou wees dat ek gestraf sou word vir die wit leuentjie oor Kersdag. Groot was my verligting toe die ‘sales’-baas ons herinner dat ek en ’n meer ervare verkoopsman aangebied het om die kantoor weer van die 3de Januarie te beman. Dit beteken dat ek, tenminste nog tot die 3de Januarie, werk het. Ek moet bieg dat ek die res van die week maar baie lig geloop het. Later die dag het ek gesien hoe die baas een van die verkoopsmanne inroep wat byna alleen in die kantoor gesit het, terwyl al die ander ervare verkoopsmanne weg was. Ek het hom nie weer gesien nie en later gehoor hy is ge-‘fire’. Ek het besef dat dit beter is om tenminste besig te lyk, of by potensiële kliënte aan te klop, eerder as om in die kantoor te sit, want dan lyk dit vir die baas of jy sukkel. Van Maandagaand af slaap ek weer vas.

Die een 'sales'-manager het my saam met so klein groepie mense genooi om saam met hulle te gaan golf speel op die laaste oggend, net voor 'n afsluitings-'BBQ' by die werk. Dit was 'n welkome uitnodiging aangesien niemand lus is om op die laaste dag van die jaar enige groot aankope te doen (of vir verkoopsmanne) nie. Die vars lug en son was heel lekker en het my gehelp om 'n laë profiel te handhaaf op kantoor vir die laaste halwedag. 

Ons was baie besig/treurig hierdie jaar en het geen Kerskaartjies gestuur nie. Jammer, ons sal volgende jaar meer voorbereid wees. Dit was ook die laaste kans vir Kers inkopies. Ons koop maar vir mekaar baie geskenke, dan is daar darem iets onder ons boom. Kers inkopies is vir my vrou veroorsaak baie angstigheid. Sy sien al van November uit na Kersfees en geskenke. Ek weet nie eers wat om vir haar te koop nie, maar sy sien uit daarna om te sien wat sy gekry het. Sy wil nie sê wat sy wil hê nie, want dit gaan oor die verrassing!? Die goed wat ek dink sy wil hê, pas nie in die ooreengekome-‘budget’ nie. Daar is nogal ’n paar interessante nuwe items in die winkels hierdie jaar, maar Jeanelle sal maar sukkel om bly te lyk as sy regtig ’n spookasem masjien kry. Dit sal ook heeltemal teveel verwagting skep as daar so ’n groot geskenk onder die kersboom is. lol. (Jeanelle se geskenk het wel vandag hier aangekom, betyds vir Kersfees. Ek het eers gedink dat hulle dalk my geld gesteel het, maar ek sal nou www.simplyelectronics.net aanbeveel vir enige elektroniese goed wat julle wil bestel.)

Ek moet bieg, ek sien meer uit daarna om die uitdrukking op Jeanelle se gesig te sien as sy haar geskenk(e)(ie)(s) oop maak en meer daarna om iets te kry, as na die inhoud. Dit is in elk geval die hele idee: Kersfees gaan oor die geboorte van Jesus (God se geskenk vir die wêreld) en daaroor gee ons vir mekaar geskenke om dit te herdenk. Dit gaan nie oor die waarde van die geskenk of jy die regte geskenk gekry het nie. Dis nie waaroor Kersfees gaan nie. (Hierdie blog het lank gevat om te skryf, want ek moes die preek uitwerk en verkort en self eers weer dink waaroor dit gaan. Ek het alle respek vir Petri, dis harde werk.)

Ons is uiteindelik op vakansie. Dis die eerste keer vandat ons mekaar ken dat ons ’n hele week saam vakansie het sonder dat ons ‘on-call’ is, of moet werk, of bekommerd wees oor ons besigheid. Ons sien uit na baie DVD kyk, strand toe gaan en rus.

Ek wens vir julle almal ’n Geseënde Kersfees en Kers-seisoen mag julle veilig reis en as indien julle so gelukkig is, lekker rus. Geniet dit.

Baie Groete en Liefde,

Johann

Lughawes, werk en alleen sing

Saterdag vas dit die groot regmaak vir 'die braai' by ons. As gevolg van my verkeerde berekeninge moes daar gou nog vleis gekoop en gemarineer word. Ons het net 8 van alles gehad en sou 10 mense in totaal wees. Ja, dis nogals 'n groot groepie, maar na so 'n lang ruk sonder onthaal, was ons seker 'n bietjie gretig. Gretig en uit oefening. Tien mense is baie om voor voor te berei met 'n kombuis wat uitsluitlik vir twee toegerus is. Dit het tot 14:00 geneem om genoeg eetgerei, glasware, opskep bakke, bestandele ens te koop.

Tussen al die verskeidenheid, was daar op hierdie dag
net 3 opskep lepels om van te kies.

Ten spyte van die bietjie roeserigheid, was die braai baie lekker. Twee mense het nie opgedaag nie, en sal ook nie gou weer genooi word nie. Daar is nogals 'n groot verskil tussen 8 en 10 mense wanneer daar net 9 blokkies tert in 'n bak pas. Met braaivleis, boerewors en Marmite/Vegimite-tert en Malfapoeding met vla, was niemand honger huistoe nie. Ons sal net volgende keer 'n ogie op die tyd hou, om seker te maak dat ons nie nagereg eers teen 23:00, direk na ete, bedien nie. Dis seker omdat dit eers 21:00 hier donker raak. (Ongeag van hoe hoog die son is, is tussen 18:00 en 19:30 'n goeie tyd vir aandete)

Ons was 2:00 in die bed en het die res van die naweek hard probeer om die verlore rus in te haal. 

Daar kan 50 mense sterf as gevolg van iemand wat perongeluk 'n verkeerde knoppie druk, maar as daar nie 'n Australianer in gevaar was nie, dan hoor ons dit gewoonlik nie in hierdie nuus nie. Ek glo dat dit ook net te danke aan die gly-gevaar vir Aussies was, dat ons van hierdie week se oorstromings by die O.R. Tambo lughawe gehoor het.  Dit is lekker om die lughawe 'n bietjie in die nuus te sien. As gevolg van die afgelope paar jare se shuttel bedryf, is lughawens (veral ORTIA) nou nie juis vir my vreemd nie.

Met al Jeanelle se reise, raak ek ook nou al hoe meer vertroud met Sydney se (Kingsford Smith) Lughawe (Vernoem na die eerste man wat in 1928 direk van Amerika na Australia gevlieg het, asof daar nou plek was om te land tussen in). Sy was hierdie week van Maandag tot Donderdag in Adelaide. 

By my werk het die baas hierdie week vier mense in die ander kantoor afgedank. Sedert ek daarvan te hore gekom het, het vrees as aanmoediging, my toegewydhied om te leer en die beste verkoopsman te word byna verbygesteek en waar ek voorheen die teiken van 60-80 oproepe gemaak het, het ek hierdie week 120 gehandhaaf. Seker dìe dat die baas ook 10 van die 15 telesales mense afgedank het. Oor die algemeen begin ek dit nou net regtig geniet en vir Kersfees sal ek tevrede wees as ek net nog my werk het. 

Dit was maar anders 'n lang en alleen week. Ek het nie besef hoe alleen dit was, totdat ek Woensdag alleen na die Engelse Dopper Kerk se Kerssangdiens gegaan het nie. Ek was effens laat, omdat die gemeente hoofsaaklik uit ou (70+) nie werkendes bestaan en hulle reeds om 17:30 op 'n Woensdag middag begin het. Ek moes gaan, want ek moes 'n geskenk oplaai wat 'n tannie (die oudste lidmaat se vrou) vir ons gestuur het. (Gelukkig reis hulle op die oomblik deur Europa en stuur sy dit toe saam met iemand anders, want ek moes vir haar, haar man(die oudste lidmaat, 90, ook nie soveel ouer as die res van die lidmate nie), en 'n ander, dierbare, dowe tannie,  geskenke vat en het in die trein met al die gejaag haar naam vergeet en 'n ander naam op een van die geskenke geskryf.)

Ek het so tussen deur ook vir Jeanelle iets oor die internet bestel, maar weet nie of dit betyds vir Kersfees/ooit hier gaan aankom nie.

Vrydag aand het ons, ons werk (vir die wat toe nog daar gewerk het) se Kersafsluiting gehad. 19:00 tot 24:00 op 'n Vrydag aand, sonder metgeselle. (Dit was nogals moeilik vir iemand wat nog skaars sy vrou hierdie week gesien het.) 'n Spoggerige affêre, met 'n 2 keuse, 3 gang maal, en die ding wat Aussies die meeste waardeer, 'n 'open-bar'?! Seker omdat dit nou hier ($40) R350 vir 24xbiere/'n bottel brandewyn kos. 

Ek hoop dat julle ook stadig maar seker die werk vir die jaar afhandel en bietjie meer tyd saam met vriende, familie en julle gesinne hierdie feesseisoen kan spandeer.

Liefde en groete,

Johann

Agter die skerms/Voor die verhoog - Ongesensord

Voor hierdie week se blog wil en net eers 'n toevoeging tot verlede week pos.
Langs die pad is daar oral Bloekombome, maar nie die reguit stamme wat ons in Suid Afrika gewoond is nie.

Oppad na Elton John, het ons by hierdie plaas-stal/kroegie gestop...

Kroegie langs die pad, tussen Sydney en Hunter Vallei

Klein-huisie by die padstal

Oulike idee vir 'n wynrak

Dit was amper meer vermaaklik om na die mense by die show te kyk as die vertoning. 

Ja, dit was op "Hope Estate". Ek het 'n paar mense afgeneem om vir julle te wys.
 

Met sulke sterk drankbeperkings !?....

....Was die sitplek aanwysings vir sommige mense te moeilik om te verstaan. (Dit was nou nie juis so ingewikkeld soos Affies se wildsfees lapa aanwysings nie)

Terwyl dit yskoud was en almal in al hulle warmste klere en mooiste swartsakke geklee was, het die breker in die pienk( of soos Rikus dit sou noem: 'Salmon') hempie seker probeer wys dat hy nie 'n moffie is nie.

Ek dink hulle was bietjie "over-dressed"

"Even though it looks like I am dressed in a condom, my intentions are mostly pure."

Oom Angus was ook daar

Hierdie gesin het gedink dis 'n kaklykkompetisie. Links sit die seun wat lyk of hy sy eie hare met 'n knipper gesny het, maar hy kon nie agter bykom nie. Regs sit die pa met 'n voël op sy linker arm getattoo. Dis 'n Arend.

Ja meisie, die wolk het op die stoel gek@*. Moenie worry nie, dis net water!

Hierdie mense het almal minder as ons betaal. Agter hulle was daar nog duisende mense wat op die nat gras gesit  het.

Na al daardie vermaak was die konsert eintlik net 'n bonus.

Elton Konsert

Ek kan nie onthou wanneer laas ek so moeg na 'n week was nie. Fisies en verstandelik.

Verlede naweek het met 'n kort rukkie se werk by Jeanelle se kantoor begin, waar ek uitgevind het dat die kombuis koekies het. (Gehad het.)  Na so 'n paar ure se werk, was dit uiteindelik naweek. (Vir die eerste keer in 2 weke).

Ons wou Sondag vroeg ry na die wynlande, maar moes eers 'n draai in die winkels maak. Daar was gelukkig nog tyd vir die Tourist Route. (Dit voel heeltyd asof mens op 'n pas ry. Die pad het deur die Sydney platteland gebiede gekronkel en dit het heelpad gereën). Ongeveer halfpad het ons b 'n padstal/drinkplek gestop vir 'n koffie. Dit het vir die eerste keer gevoel of ons van 'n meer ontwikkelde plek af kom. (Ons weet reeds ons kom van 'n meer beskaafde plek.) Na ons koffie in 'n onpaar koppies is ons weer verder.

Volgens ons weervoorspellings shou dit niks reën na 17:00 nie. Dit het toe al die tyd tot 16:55 gereën. Daarna het die son onder gegaan en 'n woeste wind het begin waai. (Dit was yskoud, selfs met  'n trui en 'n baadjie). Die Show was baie goed. Die ouens wat vir Elton John die konsert geopen het kan ek nie in fotos beskryf nie. Hulle is nogals uniek. Sien die video: (Dit mag dalk so lyk, maar dis nie 'n piret sjinese film nie, dis 'live'.)

Die mense in Elton John se orkes/"band" is al lankal nie meer kinders nie, maar hulle speel beter as ooit. (So sê hulle. Wat sal ek weet, dis nie asof ek hulle elke jaar sien speel nie.) Hulle het op die beste manier daar opgedaag: met 'n helikopter. (Geen verkeer nie)

Ek het nou nie beskrywings by gesit nie, julle kan sien wat ek bedoel met nie vandag se kinders nie.

Die vervoer was bietjie van 'n nagmerrie. Daardie wynland paadjies is nou nie juis vir 20 000 karre gemaak nie. Ons het nog gedink ons parkeer naby die uitgang, toe span hulle dit af en eindig ons heel agter in die string karre wat aan die 'doerkantste' uitgang moet uit.

Die show was 23:00 klaar. 01:30 was ons in die bed (by die huis). 4:30 was ons op sodat Jeanelle betyds by die lughawe kon wees. (Ek kon darm nog 'n uurtjie in kry, nadat taxi vertrek het, maar...) Dit was heeltemal te min. Maandae is my fone dag en dit was 'n slagting, by Jeanelle was dit niks beter nie, sy moes reel om 'n ekstra dag in Adelaide te bly. Ons werk nogsteeds daaraan om daardie slaap in te haal.

Die week het nogals 'n leer-kurwe gehad. Ek besef dat almal nie nou die produk wil hê nie, maar dis baie makliker om mense te bel en te hoor of hulle belang stel, as om deur tot deur te gaan. (Wat ek ook probeer het. lol)

Volgende week gaan Jeanelle weer Adelaide toe. (Ma-Do) Maar voor dit het ons hierdie naweek vir die eerste keer in byna 1.5 jaar weer mense genooi vir ete by ons plek. Ons het natuurlik net 8 van alles, maar hier kom Saterdag 8 mense vir 'n egte Suid Afrikaanse braai. (Nie BBQ nie.)
Ek moet net gou nog tjops gaan kry, omdat ek vergeet het om ons ook te tel. Weer nie waar almal gaan sit/staan nie, maar ek glo dit gaan lekker wees. (Sonskyn sal 'n bonus wees, want as dit reën, dan word my stoep 'n swembad.)

Ons verlang baie na al ons vriende en familie wat al by ons gebraai/geëet het. Hier moet nou ernstig gebak word. Die Marmite(Vegimite)-tert gaan nie homself maak nie.

Hoop julle geniet die naweek en gooi self 'n vleisie op die vuur.

Liefde en Groete
Johann

Work, work and no play...

Ek skryf hierdie blog vroegtydig, nadat ek moelikheid gekry het oor ek op Vrydagaande blog. (Regstelling: as gevolg van verbeterings aan die app waarmee ek blog, wat nog nie 100% is nie, kon ek dit net half voltooi op Donderdag aand.) Gelukkig, vir die blog, (ongelukkig vir my) werk Jeanelle vanaand so bietjie laat om 'n herhaling van verlede naweek te voorkom. Dit was 'n relatiewe stil week by ons op die pret frond. Ons het Saterdag en Sondag gewerk. Jeanelle het gewerk en ek het haar so bietjie gehelp en hope 'training' oor van ons produkte gedoen. My HR manager was darem baie beindruk gewees met my moeite. (zoep zoep)

Jeanelle was op Maandag en Dinsdag vir die eerste keer in Christchurch, New Zealand. Byna 10 maande na die aardbewing in Februarie, is hulle steeds besig om geboue in die stad te sloop. Daar is nog oral tekens van die verwoesting. Hulle het in die middestad 'n 'container mall' vir al die winkels, wat voorheen in die omgewing besigheid gedoen het, maar nou, as gevolg van steeds ontruimde geboue en afgeskorte strate, nie na hulle ou eiendomme kan terug keer nie. Gelukkig is die inwoners almal baie optimisties oor die toekoms. Interessante feit: Daar is meer as 60miljoen skape in New Zealand.

Ek het Dinsdagaand, in my ewige soeke na meer kennis en raad oor verkope, 'n seminaar bygewoon van een of ander Sales Guru. Die seminaar was verniet, maar die enigste parkering wat binne 5 blokke van die hotel was, het my $30 vir 3 ure gekos. (Ek is nou opsoek na iemand wat 'n 3x2m stuk grond wil verkoop in daardie area, want ek dink dit kan 'n goeie belegging wees.)

Op die verkope noot; ek het iewers hierdie week, die volgende gehoor wat nogals waar is:" Sales is the oldest profession in the world. Some people think it is something else, but that is just a subdivision of sales."

Ons het al amper vergeet van die kaartjies, maar ons gaan Sondag middag/aand, Elton John se konsert kyk. Dis in die buitelug op 'n wynplaas, iewers in die Hunter Vallei(Sydney se wynlande). In 'n stad waar ek hierdie week al gesukkel het om te slaap, omdat dit so warm was, en later, op dieselfde dag, koud gekry het, weet ek glad nie hoe om vir die konsert voor te berei nie. Ek hoop maar net Elton John kan ook klavier speel in sy geel reenjas.

Met kersfees om die draai en ons kersboom uiteindelik opgeslaan, dink ons die heeltyd aan ons vriende an familie. Ons mis julle elke dag.

Liefde en Groete,

Johann