Voorspoedige 2014! Ek hoop dat die jaar baie voorspoed en geluk vir julle sal inhou.
Die vakansie was heerlik! Ons het die naweek vir oulaas na Watsons Bay gegaan met die 'ferry' vir bietjie vis en skyfies op die strand en Divvie het in en uit die seewater gekruip op die klein strandjie sonder golwe. Hy het baie gegroei en geleer in die twee weke met sy ouers. Hy het nou al 4 tande bo en twee onder. Weet nie vir wie was dit die moeilikste om hom weer skooltoe te vat nie.
 |
| Divvie op die strand in Watson's Bay |
Na 'n heerlike rustige 2 weke vakansie, by die huis,(kortste twee weke van my lewe) met baie son, strand en kos, moes ons ook weer terugkeer na die rotresies.
Jeanelle het Maandag by 'n nuwe werk begin waar dit baie goed gaan, die atmosfeer in die kantoor is beter as de vorige slawetrein en dit lyk op die oog af of almal tenminste lekker werk en of die maatskappy in hulle mense belê en omgee vir hulle welstand. Dis so 5km van die huis af en Jeanelle sal binnekort die pad met haar nuwe fiets aandurf, ons moet net eers 'n toetslopie doen oor die naweek.
Net toe ek moed opgee, na 5 e-posse en 2 oproepe sedert 25 November en nog geen aanduiding nie, kry ek uit die bloute 'n epos wat sê dat ek toelating ontvang het om hierdie jaar te mag Honneurs swot. Vandat die registrasiegelde betaal het, is ek sommer benoud. Maar wie is bang!
Divvie het 'n bietjie van 'n slegte gewoonte ontwikkel hierdie week; om 15 minute voor my wekker wakker te word en sy bottel te wil hê. Dis alles goed en wel, ons is/was uitgerus na die vakansietjie, maar ek het besef dat ons stadig maar seker weer aan die reserwes begin gebruik, toe ek vanoggend die ketel in die mikrogolf probeer sit het.
Baie Liefde en Groete uit Sydney
Johann
